DAVAO CITY – Naaresto sa PDEA-XI ang usa ka iladong dagkong drug pusher sa Davao City human masakpan og kapin sa tunga-kilo nga gituohang shabu nga nagkantidad og P3.5 milyon sa usa ka buy-bust operation.
Ang suspek, nga nailhan nga alyas “Warlito”, 53 anyos, nadakpan human mibaligya og shabu nga nagkantidad og P7,000 ngadto sa poseur-buyer, usa ka ahente sa PDEA.
Gawas pa niini, nakumpiska usab kaniya ang 15 ka sachets sa shabu nga adunay kinatibuk-ang kantidad nga P3,536,000.
Gipahigayon ang operasyon mga alas 5:10 sa hapon sa Lunes, Nobyembre 10, 2025, sa Farland Extension, Barangay Dumoy, Davao City, uban sa koordinasyon sa Baliok Police Station 17.
Sumala sa PDEA-XI, ilado ang suspek isip usa ka dagkong drug pusher sa siyudad. (Camille Santos Naraga) (Gikan sa: Contributed)