Mas gipahugtan sa mga awtoridad sa Davao City ang pagpatuman sa curfew ordinance alang sa mga menor de edad isip kabahin sa kampanya aron mapadayon ang kahapsay ug kaluwasan sa kagabhion. Naglunsad og operasyon ang kapulisan ug mga opisyal sa barangay sa pipila ka pampublikong lugar ug mga pangunahing dalan.
Matod sa mga awtoridad, pipila ka mga kabataan nga nakalapas sa curfew ang gidala sa mga barangay hall alang sa profiling ug counseling sa dili pa gipatawag ang ilang mga ginikanan o guardian. Tumong sa programa nga malikayan ang pagkasangkot sa mga menor de edad sa krimen ug uban pang peligro panahon sa kagabhion.
Padayon usab nga gihangyo sa lokal nga panggamhanan ang mga ginikanan nga bantayan ang ilang mga anak ug makigtambayayong sa pagpatuman sa ordinansa. Gilauman nga makatabang kini sa pagmintinar sa disiplina ug seguridad sa siyudad.(Camille Santos Naraga)(Source: Contributed)