DAVAO DEL NORTE — Gidakop sa kapulisan ang usa ka 23-anyos nga lalaki nga nailhang alyas “Doydoy” human masikop sa ikinasang buy-bust operation sa Barangay Mankilam, ning siyudad, sayong bahin sa kadlawon sa Mayo 29, 2026.
Ang nadakpan usa ka ulitawo nga taga-Central Poblacion, Mati City, Davao Oriental, apan temporaryong nagpuyo sa Barangay Magugpo West, Tagum City.
Sa report sa pulisya, malampusong nakapalit ang poseur-buyer og usa ka sachet sa gituohang shabu gikan sa suspetsado gamit ang marked money nga naglangkob sa usa ka Php500 bill ug pito ka machine-copied Php1,000 bills.
Human sa buy-bust transaction, gilayon nga gi-intercept ug gidakop ang suspetsado. Nakuha usab gikan kaniya ang upat pa ka sachet sa gituohang shabu, usa ka aluminum foil strip, ug usa ka brown nga pitaka.
Gibutyag sa kapulisan nga ang total nga timbang sa nakumpiskang ilegal nga droga mokabat og tulo ka gramo nga adunay estimated value nga Php20,400 pinasikad sa Standard Drug Price.
Sa pagkakaron, anaa na sa kustodiya sa Tagum City Police Station ang suspetsado ug giandam na ang kaso batok kaniya tungod sa paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002. (Camille Santos Naraga)(Source: Contributed)