DAVAO CITY – Patay ang 76-anyos nga si Datu Roy Dilangalen, residente sa Barangay Bual Norte, Midsayap, Cotabato, human kini gipusil samtang nagmaneho sa iyang pick-up truck.
Sumala sa impormasyon, gikan sa sentro sa Midsayap ang biktima ug pauli na sa ilang barangay bandang alas 7:00 sa buntag, Marso 30, 2025. Apan gisundan kini sa duha ka armadong lalaki sakay sa motorsiklo ug kalit nga gipusil, diin naigo siya sa ulo.
Tungod sa pagpamusil, nawala sa kontrol ang sakyanan ug midiretso kini sa basakan. Sa pag-abot sa mga pulis sa crime scene sa Zone 7, Población Midsayap, Cotabato, dali nilang gi-rescue si Dilangalen ug gidala sa ospital, apan gideklarang dead on arrival.
Base sa imbestigasyon, natumbok nga nakadawat na og hulga sa kinabuhi ang biktima, nga tag-iya sa usa ka dakong basakan sa Midsayap. Ang mga awtoridad mitan-aw sa posibilidad nga rido o away pamilya ang hinungdan sa krimen.
Nagpadayon ang imbestigasyon sa kapulisan aron matino ang mga responsable sa pagpamusil.(Camille Santos Naraga)(Source: Contributed)