DAVAO CITY — Nadakpan ang usa ka 44-anyos nga babaye nga giila lamang sa alyas “Rohana”, residente sa Purok 11, Vista Mar 1, Barangay Ilang, human masikop sa usa ka buy-bust operation atol sa “Oplan Megashopper” nga gilusad sa Criminal Investigation and Detection Group (CIDG) kauban ang Bunawan Police Station 6, sa koordinasyon sa Davao City Vice Regulation Unit – Anti-Smoking Section.
Base sa imbestigasyon, napalitan si Rohana og 20 master cases sa sigarilyo pasado alas 7:00 sa gabii, Hulyo 2, 2025. Nakuha pa gikan kaniya ang daghang karton sa sigarilyo nga gibanabana og kantidad nga P660,000.
Gisupak sa suspetsado ang Republic Act 10643 o ang “Graphic Health Warnings Law”, nga nagmandato sa pagbutang og hulagway nga pahimangno sa kadaot sa panlawas sa tanang tobacco products.
Sa pagkakaron, gikustodiya na sa CIDG–DCFU ang mga nakumpiskang ebidensya lakip ang mini van nga gisakyan sa suspek nga gikargahan sa ilegal nga sigarilyo.(Camille Santos Naraga)(Source: Contributed)