DAVAO CITY – Nabitik sa buy bust operation ang usa ka 21-anyos nga babaye, kinsa nakuhaan sab og dakong kantidad sa alegasyong druga sa Agleham St., Block 4, S.I.R. Phase 1, Brgy. 76-A, siyudad sa Davao, gabii sa adlaw’ng Domingo, Hulyo 20, 2025.
Suspek giila nga si alyas Chang, usa ka negosyante ug molupyo sa dapit.
Matud sa police report, napalitan sa poseur buyer ang suspek og usa ka pakete sa alegasyong shabu nga naa sa P34,000 ang kantidad ug gibayran og P15,500 nga buy bust money.
Dihang nabulabog, nabawi sab kaniya ang laing unom ka mga sachets sa gituohang druga nga mobalor sa P204,000; nasakmit sab ang laing dagkong binalot nga ‘white powdery substance’ nga mibalor sa P952,000.
Gawas niini, nabawi sab sa posisyon ni alyas Chang ang daghang nagkadaiyang kolor sa giingong party drugs nga miabot sa P25,500 ang kantidad ug ubang ebidensiya.
Suspek, gitakdang mag-atubang og kasong paglapas sa R.A. 9165 kon Comprehensive Dangerous Drugs Act.