DAVAO CITY – Gisaulog ang Farmers and Fisherfolk Fun Day niadtong Hulyo 3 sa DavNor Training Center sa Mankilam, Dakbayan sa Tagum isip kabahin sa ika-58 nga anibersaryo sa Araw ng Davao del Norte.
Gipangulohan kini sa Provincial Agriculturist Office ug Provincial Veterinary Office, nga nagtanyag og mga serbisyo, pasidungog, ug kalingawan alang sa mga mag-uuma ug mangingisda sa lalawigan.
Lakip sa mga gipasiugdahan nga kalihokan mao ang mga kompetisyon sa pinakadakong ani—nga nagpakita sa mga produkto sama sa saging, kalabasa, talong, kamoteng kahoy, hito, ug tilapia—ug mga pasundayag sa sayaw ug kantahan nga giapilan sa 11 ka mga lungsod.
Nagtanyag usab ang maong aktibidad og libre nga serbisyo sa beterinaryo, sama sa pagkapon sa hayop ug bakuna batok rabies para sa mga iro ug iring.
Giatendan ang kalihokan nila Dr. Dennis Sumaoy, Engr. Christopher Dalisay, Arnel Montero nga representante ni Gov. Edwin Jubahib, Cloribencita Silvosa, ug mga bisita gikan sa nagkalain-laing LGUs.(Camille Santos Naraga)(Source: Contributed)