DAVAO CITY – Gidakop ang usa ka lalaki nga nailhan sa alyas “Master,” 33 anyos, residente sa Purok 2, Fatima, Barangay 24-C, Davao City, human masakpan sa usa ka drug buy-bust operation. Ang suspek giklasipikar isip Top 1 City-Level High Value Individual (HVI) sa ilegal nga droga.
Sumala sa ulat sa City Drug Enforcement Unit sa Davao City Police Office (CDEU-DCPO), gipahigayon ang operasyon pasado alas 4:00 sa hapon niadtong Disyembre 21 sa maong lugar. Atol sa operasyon, nakapalit ang usa ka pulis nga nagsilbing poseur buyer og usa ka sachet nga adunay giingong shabu.
Human sa pagdakop, narekober pa gikan sa suspek ang usa pa ka sachet sa giingong shabu. Gibanabanang moabot sa ₱136,000 ang kinatibuk-ang kantidad sa nakumpiskang ilegal nga droga.
Ang drug buy-bust operation gihimo uban sa mga operatiba sa Regional Police Drug Enforcement Unit XI (RPDEU-XI) ug sa koordinasyon sa Santa Ana Police Station 1. (Camille Santos Naraga)(Source: Contributed)