Nadakpan sa gilusad nga operasyon sa Kapalong Municipal Police Station (MPS) ang usa ka wanted person nga nailhan sa alyas “Lucas” sa lungsod sa Kapalong, Davao del Norte.
Ang operasyon gihimo sa hiniusang pwersa sa Kapalong MPS ug sa Davao del Norte Police Intelligence and Detection Management Unit (DNPIDMU) ubos sa direktang pagdumala ni PMAJ Bryle F. Patalinghug, Chief of Police.
Giservisyohan sa mga awtoridad ang suspek sa Warrant of Arrest nga gi-isyu batok kaniya alang sa kasong Homicide, isip kabahin sa Simultaneous Anti-Criminality Law Enforcement Operations (SACLEO).
Sa pagpatuman sa warrant, gisunod sa mga pulis ang hustong pamaagi pinaagi sa paggamit og alternative recording device ug gipahibalo usab sa suspek ang iyang Miranda Rights sa pinulongang iyang masabtan.
Human sa pagdakop, gidala ang suspek sa Kapalong MPS alang sa booking, dokumentasyon, ug mandatoryong medical examination sa dili pa siya pormal nga i-turn over sa prisohan subay sa mando sa korte.
Matod ni PMAJ Patalinghug, ang malampusong operasyon kabahin sa padayon nga kampanya sa Kapalong MPS batok sa kriminalidad ug sa pagpangdakop sa mga wanted person aron masiguro nga ang mga adunay kaso dili makalikay sa pag-atubang sa hustisya.
Gipasiugda usab sa Kapalong MPS nga magpadayon sila sa pagpanalipod sa komunidad ug sa pagpatuman sa balaod aron mapadayon ang kalinaw ug kahapsay sa maong lugar.
Samtang giatubang sa suspek ang kasong homicide, nagpabilin siyang inosente hangtod mapamatud-an ang iyang sala sa korte pinaagi sa pinal nga desisyon sa hukuman.(Camille Santos Naraga)(Source: PNP Kapalong MPS)