Nakatigom og 42 ka sako sa nagkalain-laing klase sa basura ang mga personahe sa Coast Guard District Southeastern Mindanao (CGDSEM) atol sa simultaneous coastal clean-up nga gipahigayon sa baybayon sa DPWH, Km. 13, Panacan, Davao City niadtong Hulyo 14.
Gipahigayon ang kalihukan sa Maritime Security and Law Enforcement Group Southeastern Mindanao (MARSLEG-SEM) kauban ang BRP Malamawi (FPB-2403) ug Coast Guard Station Davao isip kabahin sa pagsaulog sa ika-12 nga Founding Anniversary sa Maritime Security and Law Enforcement Command (MARSLEC).
Sumala sa CGDSEM, ang kalihukan nagtumong sa pagpalig-on sa kahibalo sa publiko bahin sa pagpanalipod sa kinaiyahan ug sa pagdasig sa aktibong partisipasyon sa komunidad sa pagmintinar sa kalimpyo sa mga baybayon ug kadagatan.
Ang tanang nakolektang basura tukmang gihipos ug gitangtang aron malikayan ang pag-anod niini ngadto sa dagat ug makunhuran ang polusyon sa marine environment.
Gipasiugda sa CGDSEM nga magpadayon kini sa pagpatuman sa mga inisyatibo nga nagsuporta sa pagpreserbar sa kinaiyahan ug sa responsableng pagdumala sa mga baybayon ug katubigan.(Camille Santos Naraga)(Source: CGDSEM)