DAVAO CITY – mukabat sa kapin 400 ka pamilya ang naapektuhan sa kalit nga pagbaha sa Barangay Tumaga karong hapon, Agosto 25, 2025, diin misulod ang tubig sa mga balay sa Filinvest, Kalayaan, Ayudahan, ug Paraiso Homes tungod sa kusog nga ulan.
Dali nga miresponde si Mayor Khymer Olaso, kauban ang CDRRMO, barangay officials, ug mga volunteers aron matabangan ang mga residente. Apil usab sa naapektuhan ang pipila ka mga sakyanan nga nahulom sa tubig baha. Sa inisyal nga ihap, 407 ka pamilya ang napugos nga lumikas.
Matud ni Mayor Olaso, ginasaligan nga makatabang ang pagpalit og water pumps ug pagpalapad sa drainage system aron makunhoran ang epekto sa pagbaha. Aminado usab siya nga dugay na kini nga problema sa siyudad ug padayon nga ginapangitaan og solusyon sa lokal nga gobyerno.
Gipasabot sa mga residente ug barangay officials nga bisan hinay nga ulan, makasinati na og baha ang lugar ug ginatiis na nila kini sulod sa kapin usa ka dekada.
Dayon usab nga nanghatag og relief goods ang City Social Welfare and Development Office alang sa mga apektadong pamilya.(Camille Santos Naraga)(Source:Contributed)