Davao City – Upat ka mga indibidwal ang nakaangkon og minor injuries human magbangga ang upat ka mga sakyanan sa Barangay Binugao, Toril District sa Davao City, pasado alas 10:28 sa buntag, Huwebes, Mayo 1, 2025.
Base sa inisyal nga report sa Davao City Police Office, nalambigit sa aksidente ang usa ka Suzuki Ertiga nga gimaneho ni alyas Reynante, nga sakay ang iyang asawa; usa ka Kawasaki nga motorsiklo nga gimaneho ni alyas Rico uban ang iyang 17-anyos nga anak; usa ka Ford Ranger nga gidrayban ni alyas Karl; ug ang Fuzo Cargo truck nga gimaneho ni alyas Eddie.
Sumala sa imbestigasyon, nagsugod ang disgrasya sa dihang nabanggaan sa cargo truck ang gisundan niini nga Ford Ranger. Tungod sa kusog nga impact, misarasay ang pick-up, nadumbol ang kasugat nga motorsiklo ug misungag pa sa gasunod nga sakyanan.
Ang mga biktima dali nga gitabang sa mga nagresponde ug gidala sa pinakamalapit nga ospital alang sa medikal nga atensyon.
Nagpadayon pa ang imbestigasyon sa kapulisan aron masuta ang tinuod nga hinungdan sa aksidente ug kung adunay responsable nga atubangon og legal nga aksyon.(Camille Santos Naraga)(Source: Contributed)