MAWAB, Davao de Oro – Nadakpan sa mga operatiba sa Davao de Oro Provincial Office sa Philippine Drug Enforcement Agency Regional Office 11 (PDEA RO 11), uban sa Mawab Municipal Police Station, ang usa ka high-value individual atol sa buy-bust operation nga gihimo alas 3:27 sa hapon niadtong Hunyo 9, 2026, sa Km. 6, Purok 1, Barangay Salvacion, Mawab, Davao de Oro.
Ang target sa operasyon giila lamang sa alyas “Mack-Mack,” 32 anyos. Gidakop siya human makabaligya ug makatunol og usa ka heat-sealed transparent plastic sachet nga adunay sulod nga gidudahang shabu nga balor og ₱7,000 ngadto sa usa ka PDEA operative nga nagpanggap isip poseur-buyer.
Nakompiska usab atol sa operasyon ang lima ka pakete sa transparent plastic sachets nga adunay sulod nga gidudahang shabu nga adunay gibana-banang gibug-aton nga 52 gramos ug gibanabana nga street value nga ₱364,000. Nabawi usab sa mga awtoridad ang buy-bust money nga gigamit sa transaksyon.
Lakip sa nasakmit ang motorsiklo nga gigamit sa suspetsado sa iyang giingong iligal nga kalihokan sa droga.
Giapandam na sa mga awtoridad ang kasong paglapas sa Republic Act 9165 o ang Comprehensive Dangerous Drugs Act of 2002, nga iduso ngadto sa piskalya batok sa nadakpang suspetsado.(Camille Santos Naraga)(Source: Contributed)