Giadakop ang tulo ka lalaki human masakpi sa kapulisan nga nag-inum duol sa dike sa Bolton Ice Plant, Barangay 1-A, Davao City, alas 10:00 sa gabii niadtong Mayo 11, 2025.
Gipangila ang mga suspetsado nga sila alyas “Angelito,” 25 anyos, usa ka construction worker; alyas “Arlo,” 31 anyos, usa ka photographer; ug alyas “Michael,” 24 anyos, usa ka estudyante.
Base sa report sa kapulisan, nasakpan ang grupo nga nag-inum ug gireklamo kini sa usa ka concerned citizen, hinungdan nga gilayon kini girespondehan sa mga otoridad.
Nalapas sa mga suspetsado ang Liquor Ban nga gilatid sa COMELEC Resolution No. 11057, nga may kalabutan sa 2025 midterm elections.
Gipangpriso na ang tulo samtang nagpadayon ang imbestigasyon.(Camille Santos Naraga)(Source: Contributed)