Nasikop sa duha ka managlahi nga operasyon ang upat ka lalaki sa mga lungsod sa Duero ug Calape, Bohol tungod sa ilang kalapasan sa COMELEC Gun Ban ug sa Republic Act 10591.
Sa Duero, alas 11:30 sa gabii sa Mayo 10, 2025, mitubag ang kapulisan sa report gikan sa Barangay Itum nga adunay duha ka suspetsado nga lalaki nga armasado. Pag-abot sa mga pulis, nadakpan ang duha ka lalaki, ang usa 50 anyos ug ang usa 46 anyos, nga taga Candijay, Bohol.
Nakuhaan sila og usa ka caliber .45 nga pistola nga may bala ug usa ka caliber .357 revolver nga may sulod usab nga bala. Nahitabo ang insidente duol sa balay sa kapitan ug sa barangay nga gipuy-an sa incumbent mayor.
Gisusi sa mga otoridad ang posibilidad nga ang duha ka suspetsado mituyo sa pagpanghilabot sa lokal nga eleksyon.
Sa sayo nga bahin sa adlaw, alas 10:15 sa buntag, sa Barangay Bonbon, Calape, duha ka retirado nga militar ang nadakpan sa mga pulis human mareport nga nagdala og armas. Taga Cagayan de Oro City ang duha ka suspetsado.
Nasakmit gikan kanila ang duha ka caliber .45 pistola, duha ka magazine, daghang bala, duha ka Baofeng handheld radios, duha ka sling bag, ug usa ka cellphone.
Ang tanang suspetsado karon anaa sa kustodiya sa ilang tagsa-tagsa ka municipal police stations samtang giandam na ang mga kasong ipasaka batok kanila.
Source: PRO7- PIO