Nasakpan sa Bureau of Immigration Region XI (BI XI) uban sa suporta sa 10th Infantry Division sa Philippine Army ang 24 ka Chinese nationals atol sa joint law enforcement operation sa Purok 4, Barangay New Little Panay, Panabo City niadtong Mayo 25, 2026.
Base sa impormasyon nga nadawat sa mga otoridad, giingong adunay mga langyaw nga nagtrabaho sa lugar bisan walay tukmang permit ug adunay kuwestiyonableng immigration documents, hinungdan aron ipahigayon ang operasyon.
Sa imbestigasyon, 27 ka Chinese nationals ang gisusi apan 24 kanila ang nakit-ang adunay mga paglapas sa Philippine Immigration Act of 1940.
Lakip sa mga nadiskubreng paglapas mao ang pagtrabaho nga walay hustong visa o permit, overstaying, ug paggamit sa tourist visa bisan nagtrabaho na sa nasud. Nadiskubre usab nga adunay uban kanila nga nagtrabaho sa kompaniyang lahi sa nagpetisyon sa ilang visa.
Sa pagkakaron, anaa sa kustodiya sa Bureau of Immigration ang mga nadakpan samtang ginapadayon ang proseso ug dokumentasyon batok kanila sulod sa compound sa Tri-Shining International Oil Corporation / Kunheting Corporation sa Panabo City.(Camille Santos Naraga)(Source: NBI 11)