DAVAO CITY – Giila sa Davao City Police Office (DCPO) ang usa ka 14-anyos nga babaye, kanhi estudyante sa Daniel R. Aguinaldo National High School, nga maoy responsable sa pekeng bomb threat nga gipost sa social media niadtong Oktubre 23, 2025.
Sumala sa kapulisan, ang menor-de-edad nga estudyante nagpost sa social media nga adunay land mine nga gibutang sulod sa eskwelahan, apan iyang gitangtang ang maong post human siya mahadlok sa posibleng sangputanan.
Kauban ang iyang inahan, boluntaryong misurrender ang maong estudyante sa mga otoridad.
Gipasabot sa DCPO nga ang menor-de-edad ipasailalom sa counseling ug suod nga pagmonitor human sa insidente aron malikayan ang susamang panghitabo sa umaabot.(Camille Santos Naraga)(Source: Contributed)