DAVAO CITY – Usa ka 63-anyos nga lalaki ang namatay human masangkot sa bangga tali sa usa ka Mitsubishi Mirage G4 ug trailer truck niadtong alas 2:55 sa hapon, Dominggo, Mayo 18, sa Daang Maharlika Highway, Km. 27, Licanan, Barangay Lasang.
Ang biktima giila sa awtoridad isip si alyas Ed, lumolupyo sa Laak, Davao de Oro.
Kauban sa biktima ang usa ka 35-anyos nga babaye nga giilhan lang sa alyas Jana ug usa ka 5-anyos nga bata, nga pareho usab nga gidala sa ospital human makabaton og mga samad.
Sumala sa inisyal nga imbestigasyon, nagdagan sa susamang lane ang duha ka sakyanan—ang kotse ug ang trailer truck. Gituohan nga nabunggo sa truck ang kotse, hinungdan nga natulak kini paingon sa center island ug naipit.
Luwas ang driver sa kotse, samtang wala usab’y kadaut ang driver sa trailer truck nga giilhan sa alyas Vito.
Sa karon, Padayon ang imbestigasyon sa Davao City Police Office (DCPO) aron masuta ang hinungdan sa aksidente ug ang posibleng pagsaka og kaso batok sa responsable. (Camille Santos Naraga)(Source: Contributed)