Duha ka lalaki ang naaresto human makuhaan og kapin 20 ka kilo sa gituohang shabu nga nagkantidad og P136 milyon atol sa buy-bust operation nga gipahigayon sa Philippine Drug Enforcement Agency-7 (PDEA-7) sa Barangay Uling, Naga City, Cebu niadtong Sabado sa hapon.
Ang mga nadakpan giila lamang sa mga alyas Romeo ug Dante, nga parehong taga-Laguna.
Base sa imbestigasyon sa PDEA-7, kapin usa ka bulan nga gihimong subject sa surveillance operation ang duha tungod sa ilang giingong koneksyon sa usa ka dako nga drug syndicate.
Atol sa operasyon, narekober usab sa mga operatiba ang usa ka Chevrolet Optra nga adunay plakang ZGA 430 nga gituohang gigamit sa transportasyon sa ilegal nga droga.
Matud sa mga suspets, gisuholan lamang sila aron modala sa kontrabando kapalit sa P130,000.
Padayon karon ang lawom nga imbestigasyon sa mga otoridad aron mailhan ang ubang personalidad nga posibleng nalambigit sa maong ilegal nga operasyon. .(Camille Santos Naraga)(Source: Contributed)