Cebu City – Nahimong timaan sa ika-75 nga anibersaryo sa bilateral relations tali sa Pilipinas ug Denmark ang pagkahuman sa high-speed ferry nga gigama sa usa ka shipping company sa Balamban, Cebu.
Segun sa statement, gianunsyo sa DFA o Department of Foreign Affairs niadtong Marso 12 nga ang Fjord FSTR, nga usa ka 109-metros nga catamaran ferry, milawig sa Cebu padung sa Denmark niadtong Marso 5.
Ang Danish shipping company nga Fjord Line nakigsabot sa Austal Philippines alang sa construction sa barko nga adunay kapasidad nga makada og 1,200 ka pasahero ug labing minos 400 ka awto.
Ang ferry adunay tulo ka lainlaing restaurants, usa ka children’s area, tax-free shop, café, ug bistro.
Ang Austal Philippines usa ka ship-building company nga nahimutang sa Balamban, usa ka first-class municipality sa kasadpang bahin sa Cebu City.
Ang paglusad sa vessel naatol sa ika- 75 nga anibersaryo sa Philippine-Denmark diplomatic relations.
Midugang ang DFA nga sa pag-abot sa Denmark, gamiton ang ferry sa paghakot sa mga pasahero ug kargamento tali sa Denmark ug Norway. (Jhon Tadlip/JTY)
(Source: Department of Foreign Affairs, photo courtesy of Philippines Embassy in Denmark)