34.3 C
Manila
Thursday, April 18, 2024

Danger Zone Sa Usa Ka Barangay Sa Cebu City Pabiling Gipuy-An

- Advertisement -

Nagpabilin gihapon ang kapin sa singkwenta ka mga pamilya sa usa ka bahin sa Barangay Buhisan, Cebu City nga gideklarar nga danger zone.

Halos duha ka buwan na ang nakalabay sukad nga girekomendar sa Mines and Geo-sciences Bureau (MGB-7) ang pagpabakwit sa apekatadong mga residente sa Sitio Sandayong, Barangay Buhisan.

Gideklarar sa MGB-7 nga danger zone ang nahisgutang dapit gumikan sa kaduol niini sa dakong liki nga nahimutang sa kilid sa bukid.

Gi-angkon ni Buhisan Barangay Kapitan Gremar Barete nga wala pa gihapon makabakwit ang singkwenta kapin nga mga residente sa Sitio Sandayong. Gipasabot ni Barete nga ang makuti nga legal process nga naglambigit sa lot acquisition maoy  usa sa mga hinungdan nga nalangan ang pagpabakwit sa apektadong mga residente.

Subay sa maong proseso matud ni Barete nga gikinahanglan pa nga mo-agi kini sa buhatan sa City Assessor dayon ngadto sa Cebu City Disaster Risk Reduction Management Office (CCRRMO) ug usab sa Department of Environment and Natural Resources (DENR).

Ang DENR maoy mo-certify nga luwas puy-an ang relocation site. Ang nagsingabot nga 2019 midterm elections gitumbok usab ni Barete nga usa sa mga hinungdan nga dili dayon ikapatuman ang pagpabakwit sa nahisgutang mga residente.

Ang mga apektadong residente sa Sitio Sandayong nabalaka na kaayo sa ilang kahimtang tungod sa mga pag-uwan-uwan nga posibleng maoy maka-ingon sa pagdahili sa yuta.

Nanawagan ang nahisgutang mga residente nga paspasan unta sa city government ang pagpabakwit nila gikan sa maong dapit nga nalakip sa gideklarar nga danger zones.

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -