Gideklarar na nga ubos sa State of Calamity ang tibuok dakbayan sa Lapulapu kagahapon aron pagdugang og ngipon sa kampanya batok sa pagkatap sa coronavirus disease kun Covid 19.
Pinaagi sa mass motion, giaprobahan sa konseho ang ordinansa nga gisuwat ug giduso ni Konsehal Alexander ‘Junrey’ Gestopa nga nagdeklarar sa state of calamity.
Gipaboran usab sa konseho ang ubang inisyatiba ni Mayor Junard ‘Ahong’ Chan sama sa cash-for-work program ug pagpatuman sa curfew ubos sa Executive Order 2020-38.
Ubos sa state of calamity, si disaster czar Nagiel Bañacia miingon nga makagamit na sila sa P30 milyon nga Quick Response Fund (QRF) ug sa P50 milyon nga unspent trust fund batok sa Covid 19.
Ang nahisgotang kantidad gamiton pagpamalit og testing kits sa Singapore ug sa cash-for-work program.
Gani, giingong nagpaingon na ang giorder nga testing kits sa Singapore ug posibleng mahiabot kini karong semanaha.
Nagkanayon si Chan nga kon kini mahidangat, ang Lapulapu ang unang makabaton og testing kits nga bililhon kaayo sa sayo nga pag-ila sa Covid 19 nga motakboy sa tawo.
