Cebu City – Gisalikway sa kagamhanan sa dakbayan sa Lapu-Lapu ug sa regional health office ang pagduda nga nabakunahan na sa CoronaVac si Mayor Junard Chan atol sa simulation exercise kagahapon sa buntag sa gymnasium sa Brgy. Pajo.
Suma pa sa tigpamaba sa DOH 7, Dr. Mary Jean Loreche, walay aktuwal nga pagpamakuna sa mayor ug sa mga misalmot sa simulation.
Si Loreche mihulagway sa simulation exercise sa vaccine rollout batok sa coronavirus disease nga malamposon.
Ang kalihokan nga milanat og usa ka oras gipangulohan ni Mayor Chan ug ubos sa superbisyon sa DOH 7.
Una niini, nakadawat og impormasyon ang mga sakop sa media nga si Chan giingong nakadawat og tinuod nga shot sa Sinovac atol sa simulation.
Apan giinsister ni Loreche nga ang tinugyanan sa panglawas nga miapil sa kalihokan, mi-inject sa mayor og placebo, usa ka substance nga gigamit sa control groups sa COVID-19 vaccine trials.
Gipasabot sa opisyal nga di unta sila motulpok og placebo apan buot sa mayor nga ipakita sa mga tawo nga ok ra kini. (Jhon Tadlip/JTY)
(News & photo courtesy of Lapu-Lapu City Public Information Office | DOH-7)