Bisan pa man sa nagpadayong kaso sa COVID 19 sa Cagayan de Oro, mapasalamaton ang kagamhanang local ubos sa pamunoan ni Mayor Oscar Moreno nga nagpabiling ubos ang kaso sa mga nataptan sa mga persons deprived of liberty (PDLs) sa City Jail.
Gani man gibutyag ni City Epidemiologist Dr. Joselito Teodulfo Retuya Jr., nga gihimo sumbanan sa ubang detention facilities sa ubang syudad sa nasud ang paagi sa pag-atiman ug pagpugong sa pagkuyanap virus sa mga PDLs ilabina ang nataptan sa COVID 19.
Matud ni Dr. Retuya dako og tabang ang bag-o lang natibawas nga male dormitory nga proyekto sa syudad alang sa isolation sa mga COVID 19 positive ug ang ilang makanunayong monitoring sa influenza like illnesses (ILI) ug acute respiratory illnesses (ARI) sa mga piniriso.
Gipasabot ni Dr. Retuya nga bisan pa man og mag-negatibo na sa swab result ang PDLs, ila pa gihapon kining ipailawom sa 14 days monitoring sa isolation facility sa dili pa ibalik sa main dormitory.
Gilantaw usab ni Mayor Moreno nga blessing ang pagkatukod sa male dormitory ilabina ning panahon sa pandemya.
Iyang gipasalamatan ang City Health Office personnel sa pagpangulo ni City Health Officer Dr Lorraine Nery sa ‘efficient interventions’ sa jail facility ubos sa pag-atiman ni Dr. Ted Yu.
Ang Cagayan de Oro lamang ang adunay pinakaubos nga ihap sa COVID 19 sa mga PDLs sa tanang highly urbanized cities sa nasud. (City Information Office)