34.6 C
Manila
Sunday, April 21, 2024

COVID-19 Survivor Nagpasalamat Sa Sarangani Provincial Hospital

- Advertisement -

Dako ang pagpasalamat sa usa ka COVID-19 survivor sa Sarangani Provincial Hospital gumikan sa maayong pag-atiman sa mga doktor ug nurse sulod sa katorse (14) ka adlaw. Sa maayong akomodasyon bisan na sa pagkaon nga gidalit sa matag adlaw, nakatabang matud pa kini tanan sa iyang pag-ayo, gihimo silang instrumento sa Ginoo.

Sa pagsugod sa Coronavirus pandemic, may gigahin na nga dakong lawak si Governor Steve Chiongbian Solon sa Sarangani Provincial Hospital isip provincial isolation facility, sa pagsuporta sa tanang board member, ni Vice Governor Elmer De Peralta ug nila Senador Manny ug Congressman Ruel Pacquiao.

Si Sarah, trayntay otso (38) anyos, usa ka trabahante, ang nagpamatuod nga tinuod ang COVID-19. Wala pay bakuna nga na-imbento apan may mga tambal matud pa nga pwedeng madapat depende sa sintomas nga gagawas. Kung walay sintomas, angay nga magpasalamat apan kinahanglan nga magma-ampingon tungod carrier gihapon kini sa virus.

Nakasinati si Sarah og ubo-bo adlaw nga Sabado, pagka-Dominggo nikatol na matud pa ang iyang tutunlan. Pagka-Lunes sa kadlawon gihilantan na kini niabot ang temperatura sa 38.3 degrees Celsius. Nawala ang hilanat pagka-Martes.

Iyang gi-report dayon ang iyang nabatyagan sa mga health official. Paspas nakapahigayon og antigen swab test. Samtang, nagpaabot sa resulta sa RT-PCR aron makumpirma ug sa pagsugod pa lang sa iyang sintomas, hugot na niining gipatuman ang kwarantina. Wala na sya nagpaduol sa iyang pamilya ug mga silingan aron walay matakdan.

Sa pirmero, nagtuo kini nga makaya ra niini ang masinatian nga ubo tungod may balatian na kini nga asthma. Apan sa paghidangat sa ika-dose (12th) ka adlaw gikan sa paggawas sa iyang sintomas, gihutoy na kini sa pag-ubo, pneumonia na diay ang iyang nahulugan. Nisakit usab ang iyang dughan daw gisumbag ang iyang dughan.

Gibalikan kini sa hilanat sa ika-pito (7th) ka adlaw gikan sa paggawas sa sintomas, ug nawala ang pamugnaw human pa sa upat ka adlaw dungan sa pagpainum ug pag-injection kaniya og mga antibiotic.

Dili na makatakod ang Coronavirus human sa ika-onse (11th) ka adlaw gikan sa paggawas sa mga sintomas apan pwedeng mulungtad sa pipila ka adlaw ang mga kumplikasyon, sama sa pneumonia. Nawad-an usab kini og panglasa, dili malasahan ang mga gipang-kaon sugod sa ika-upat (4th) ka adlaw gikan sa paggawas sa mga sintomas.

Nigawas si Sarah sa hospital nga walay gibayran. Aduna kini hospital bill nga muabot og sobra Singkwenta Mil ka pesos (P50K). Maong dako ang iyang pagdayig ni Governor Solon sa pag-siguro nga adunay provincial hospital, sa pagpangamot usab matud pa nila Provincial Health Officer Dr. Arvin Alejandro, Provincial Chief of Hospital Dra. Aileen Brion, mga batan-on apan mga maayo nga internist, general practitioner ug nurses.

Halos tanan nga health protocol ang natuman ni Sarah. Pirme kini nga naka-face mask ug naka-face shield, naka-distansya sa mga katapad sa opisina, ug gapang-alcohol sa mga kamot. Apan ang wala niini nabuhat ang pagligo sa gawas una musulod sa ilang panimalay.

Hangtud karon, wala kini masayod kung asa nakuha ang virus sa area sa Gensan. Maong panigurado na lang matud pa nga hubuon sa gawas ang mga gipang-suot, humulan usa labhan, dayon kaligo una musulod sa balay. Hinuon, dakong tabang ang pagtuman niya sa mga safety protocol tungod bisan usa sa iyang mga kauban sa opisina ang wala kini matakdi. (Roniel Degorio)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -