Nagkatigum kagahapong adlawa, adlaw nga Hwebes, sulod sa Sarangani Capitol Gymnasium ang mga municipal health officer, municipal disaster risk reduction and management officer ug ang mga counterpart nila sa probinsya aron pakusgon pa ang koordinasyon sa Kapitolyo ug mga munisipyo sa pagtagbo sa Returning Overseas Filipinos (ROFs) ug Locally Stranded Individuals (LSIs).
Segun ni Engineer Gerald Faciol, ang assistant provincial administrator ug maoy nangulo sa Provincial RFO-LSI Focal Team ilalum sa superbisyon ni Governor Steve Chiongbian Solon, anaa karon ang Pilipinas ug tibuok kalibutan sa krisis maong lauman na matud pa ang mga worst-case scenario sa hinanaling pagtagbo ug pag-atiman sa mga kaigsoonang Sarangan nga buot ng makauli sa ilang hometown.
Ila matud pa nga nasabutan sa coordination meeting kagahapon nga kung manawag ang nasyonal nga gobyerno sa kamanduan ni Pangulong Rodrigo Duterte nga adunay mga Sarangan ang sakay sa mga eroplano, automatic na matud pa nga magpadala ang matag munisipyo sa ilang mga sakyanan may sulod man kini nga pasahero o wala sa pag-uli.
Pinaspasay na matud pa ang nahitabo sa Maynila maong maulahi na ang ilang pagpabalo sa mga LGU o dili ba kaha dili dayon mahan-ay kung si kinsa ug pila kabuok ang sakay nga mga taga-Sarangani. Maong maniguro ug mag-contingency na lang daan ang ilang buhaton nga pagpangandam.
Kahibaluan nga niaging adlaw nga Lunes, niabot ang unang batch sa mga Returning OFW sa Gensan Airport kung diin usa (1) ka oras lang ang nahimong abiso ug pagpabalo ngadto sa LGU Sarangani nga aduna nay muabot gikan sa Maynila. Napangitaan kini nila og pamaagi aron masundo gamit ang mga sakyanan sa Kapitolyo sa Sarangani ug sa mga munisipyo onboard ang mga medical ug non-medical personnel nga nakasuot tanan og PPE kon personal protective equipment suit panigurado nga walay matakbuyan sa Coronavirus simbako adunay mag-positibo.