Cagayan de Oro City – Ang efficiency rating sa contact tracing sa Cagayan de Oro anaa sa ubos sa national health standards matud pa ni Baguio Mayor Benjamin Magalong. Si Magalong nahidangat sa Cagayan de Oro uban sa National Inter-Agency Task Force ubos ni Secretary Carlito Galvez aron sa pagbansay-bansay sa mga PNP personnel ug Barangay Health Emergency Response Teams (Bherts) labot na sa contact tracing.
Matud pa sa mayor sa Baguio ang contact tracing sa Cagayan de Oro apil na sa Iligan City anaa lamang sa 1:4 matag Covid-19 patient. Matud niya ang ideal national benchmark alang sa malampusong contact-tracing program mao ang 1:37 matag Covid-19 patient. Kini nagpasabot nga ang nacontact trace lamang sa teams dinhi sa syudad mao lamang ang close sa pamilya ug wa mahiapil ang ubang close contact sa pasyente sa Covid-19.
Gisugilon ni Magalong nga kon ibase sa national standard nga 1:37 o ang pinakaubos 1:20, ang team dinhi sa syudad nagkulang sa mga potentially infected persons. Ug kini nga mga tawo, dugang pa niya naglakaw-lakaw kini sa kadalanan ug nakatakod pa sa daghang katawhan.
Sa IATF ug mga Department of Health misagop karon sa method ni Mayor Magalong kabahin sa contact tracing isip bag-ong bench mark alang sa malampusong contact tracing program.
Ang low efficiency rating sa contact tracing sa Cagayan de Oro, matud sa Mayor nagsumikad kini sa gamay ra kaayo nga RT-PCR tests alang sa mga suspected infections. Ang data nagpakita nga ang RT-PCR tests makahimo lamang sa 5% sa populasyon sa syudad nga kapin sa 500 ka libo ka mga residente. Aron sa pagsulbad niini, matud ni Magalong ang DOH mohatud sa dugang RT-PCR aron ang syudad aron kini makatest sa dugang residente ang mga health teams. (Philippine Information Agency X)
