Masaligon si Gob. Roel Degamo sa Negros Oriental nga ang resulta sa comfirmatory test sa walo ka patients under investigation kun PUI negatibo gihapon sa 2019 novel coronavirus kun nCoV.
Sumala pa sa tigpamaba sa probinsiya, Bimbo Miraflor, nakaingon niini ang gobernador dihang ang nahibiling tulo ka PUI nagnegatibo man sa nCoV.
Ang tulo ka test result nga gipagawas sa RITM kun Regional Institute for Tropical Medicine nahiabot gahapon ug nakompleto na ang tanang resulta nga pulos negatibo.
Subay niini, matod ni Miraflor, nagpaabot na lang sila sa resulta sa confirmatory tests.
Ang walo ka PUI gilangkoban sa upat ka sakop sa hotel, drayber sa van ug pedikab, katupad paglingkod sa turistang Insek nga napositibo sa coronavirus ug usa nga nakabiyahe sa nasod nga apektado sa virus.
Midugang si Miraflor nga naglaom si Gob. Degamo nga negatibo gihapon ang resulta sa confirmatory test ug makagawas na ang walo ka PUI sa Negros Oriental Provincial Hospital (NOPH) sa Dumaguete diin sila gi-quarantine og katorse ka adlaw.
Gawas sa mga PUI, naa usay 65 ka patients under monitoring kun PUM nga nakahuman na sa 14 ka adlaw nga kwarantina.
Samtang ang nahibiling tulo ka PUM – duha ka Chinese ug usa ka Polish national – karong adlawa pa makakompleto sa ilang quarantine.