Cebu City – Giklaro sa opisyal sa Commission on Elections sa Cebu City (Comelec-Cebu City) ngadto sa mga voters nga wala pay balaud nga nag postpone sa Barangay ug Sangguniang Kabataan (SK) elections karong umaabot Disyembre taliwa sa mga espekulasyon, nga mamahimong maka apekto sa voter registration turnout.
Gibutyag ni Atty Marchel Sarno, Cebu City North District election officer nga padayon ang preparasyon alang sa Barangay ug SK elections karong Disyembre 5.
Kini bisan pa man nga ilang na obserbahan ang ‘average’ turnout sa applicants sa sa duha ka semana sukad mibukas pag usab ang voter registration niadtong Hulyo 4.
“Ang akong masulti… average ra atong turnouts run so far… Although mas daghan atong registrants sa atong satellite (registration centers) compared sa atong (election) offices,” pahibaw ni Sarno.
Matod sa opisyal nga ang Comelec-Cebu City maka tala ug 400 ngadto sa 600 ka mga registrants gikan sa tanan nilang off-site registration centers sa usa ka adlaw.
Giangkon niini nga ang mga espekulasyon ug mga reports sa mga magbabalaud nga nagtinguha pag postpone sa Barangay ug SK elections naka apekto sa bag-ong voter turnouts.
“Daghang speculation nga ma-postpone and election… Mao pud ni siguro – one of the factors nga ingani ang turn-out,” pasabot ni Sarno.
“The more ka magspeculate, the more na di ka magplano. So, the more nga maglisod ka sa last day of registration. Hinaut nga dili sila maglangay-langay. Magparehistro na sila,” dugang sa opisyal.
Alang sa North Distict, ang registration anha sa Robinsons Galleria Cebu gikan sa Hulyo 18 hangtud sa 23.
Samtang sa South District, ang registration anha sa SM Seaside Cebu City, nga nagsugod sa Hulyo 4 hangtud sa 16 ug sa Robinsons Galleria Cebu gikan sa Hulyo 18 hangtud sa 23.
Kadtong botante nga nag edad ug 15 hangtud sa 30 anyos maka botar sa barangay ug SK elections.
Kadtong kinahanglan nga mo transfer sa ilang voter registration sa bag-ong barangay o sa syudad o munisipalidad, dawaton sa offsite registration. (Jhon Tadlip)
(News & photo courtesy of Comelec-Cebu City)