Davao City – Mukabat sa 5,000 pesos ang ipahamtang nga multa ug mamahimong ma-priso ang mga close contact sa mga pasyente nga nagpositibo sa Covid-19 nga magdumili sa pagpaubos sa RT-PCR test.
Kini human nga nakalusot na atol sa third and final reading sa Davao City 19th Council ang ordinansa nga himuong mandatory ang RT-PCR Testing sa tanang mga F1, F2 ug F3 Contacts sa mga Confirmed Positive Case sa Covid-19 dinhi sa syudad.
Ubos sa maong ordinansa, libre ang testing base sa schedule nga ihatag sa Contact Tracing Team o District Health Offices. Kinahanglan nga musulti sa tinuod ang pasyente ug ihatag ang tukma nga impormasyon sa mga nahimong close contacts, lakip na ang address, gitrabahuan ug cellphone number aron nga matawagan sa tracer. Anaa usab sa ordinansa nga dili mandatory nga ipaubos sa quarantine ang F2 ug F3 labi na og wala kiniy simtomas sama sa ubo ug sip-on. Apan gipasidan-an nga kinahanglang magself-monitor ug mag-obserba sa minimum health protocols.
₱ 5,000 ang multa ug mamahimong ma-priso ang F0 o F1 contacts nga musupak sa maong ordinansa. Samtang ₱ 3,000 o pagka-priso alang sa F2. ₱ 500 pesos nga multa alang sa F3 contacts nga magdumili sa mandatory RT-PCR testing. Gipaklaro ni Konsehal Maria Belen Acosta, Chairperson sa Committee on Peace and Public Safety ug maoy proponent sa maong ordinansa, tumong niini nga matumbok dayon ang mga na exposed sa covid-19 positive ug malikayan ang transmission sa virus.
(Source: SP | Office of Coun. Acosta)