Gipahinumduman sa City Anti-African Swine Fever Task Force ang mga backyard hog raisers nga likayan o undangon ang pagbahog og pasaw ngadto sa ilang binuhing baboy ilabina ang pasaw nga kinolekta gikan sa silingan, karinderya, o pinalit gikan sa mga restaurants, food chains ug uban pa nga mga kan-anan.
Kini tungod kay dako ang posibilidad nga kontaminado kini sa African Swine Fever (ASF) virus nga maoy hinungdan nga masakit ang mga baboy ug mamatay.
Mahimong magbahog og pasaw gikan sa recycled nga pagkaon sama sa gulay, prutas ug uban pa nga walay sagol nga processed meat products.
Sa kasamtangan, 17 na ka barangay ning syudad ang naigo sa ASF ug nakaapekto sa mokabat 618 farmers diin nahatagan na usab og indemnification cash assistance gikan sa syudad nga dos mil pesos sa matag baboy nga na-culling.
Nagpadayon ang syudad pinaagi sa Anti-ASF Task Force pagpatuman sa mga lakang aron masumpo ang pagkuyanap sa ASF dinhi sa syudad.
Kung dili gyud kaya nga dili magbahug sa pasaw kay dili ka-afford sa pasaw or dili kabalo magpatuman sa biosecurity measures sa babuyan, pagbuhi na lang aa lain mananap nga panginabuhian sama sa kanding. (City Information Office)