Davao de Oro – Gibisita mismo ni Gov. Jayvee Tyron Uy ang Barangay Anitapan ug ang Brgy. Golden Valley ngaa pulos sakop sa Mabini aron personal niyang mapahibalo ang hapit na sugdang mga proyekto niining mga barangays nga pulos makabahin sa tag ₱ 20 Milyones kantidad sa mga proyekto nga ibubo sa Malacañang ilalom sa Barangay Development (BDP) Program.
Ang site visit nahitabo matud sa gobernador niadtong Sabado (Feb.27, 2021) diin una niyang gitan-aw ang padayon pa gipatrabaho sa probinsya nga relocation site diha sa Mascareg, Anitapan para sa gagmayng mga minero nga namiligro sa landslide. Plano sad matud pa niya nga kini pataoran ug tubig, kuryente, ug evacuation center nga pagatukoron sa moabot nga mga adlaw.
Moabotay nga mga proyekto sa Brgy. Anitapan matud pa niya ang improvement sa Barangay Health Station, upgrading and improvement sa Bucana-Mambatang Farm to Market Road, ug Construction of Water System. Sa Brgy. Golden Valley ang Improvement sa Barangay Health Station, Upgrading and improvement sa Candinuyan-Barigyan Farm to Market Road, Upgrading sa Settler-Shanghai-Dasuran Farm to Market Road, ug Construction of Water System.
Tuyo sad matud pa sa iyang pagbisita ang pagkunsulta sa kahimtang karon sa mga katawhan diha sa barangay samtang padayon pa nga gipailom sa Modified Community Quarantine ang tibuok probinsya. Iyang kauban sa gihimong pagbisita sila BM Nicky Opisan, former BM Randy Opisan, mga dagkong opisyal sa kapulisan ug kasundalohan, ug uban pa.
“Karong buntaga, atong gibisita ang atong mga igsoon sa mga upland barangays sa Mabini- ang Golden Valley ug Anitapan. Atong gikonsulta ang ilang kahimtang ilabi na nga padayong anaa sa quarantine ang atong probinsya. We also checked the current situation sa atong ginabuhat nga relocation site sa atong mga minero sa Mascareg nga atong ipabalhin tungod sa risgo sa landslides. Plano nato nga tukuran sila, ang ilang relocation site og evacuation center, patauran nato’g tubig apil kuryente. Malipayon usab natong gibalita kanila ang mga muabotay nga mga proyekto sa ilang barangay ilalom sa Barangay Development Program (BDP)”.Matud ni Gov. Tyron Uy.
(Gilbert M. Cabahug, PAO-ID DDO | Michael Manguhig, RPN DXKT Davao OIC)
