Walay ipahamtang ang kagamhanan sa dakbayan sa Cagayan de Oro nga bag-ong buhis o’ kaha pagsaka sa buluhisan sa umaabot tuig 2021, sigun pa ni Assistant City Treasurer for Operations Engr. Leonil Mistula.
Gibutyag ni Engr. Mistula nga ang ilang gibasihan karon sa pagkolekta sa buhis mao pa ang 2015 tax revision.
Si Engr. Mistula nagkanayon nga ilang nasabtan ang nasinating kalisdanan ug pagkalugi sa mga negosyante sa syudad karong tuiga tungod sa krisis, busa makiangayon lang usab ang gihimong lakang sa syudad tungod sa kasamtangang sitwasyon ug kahimtang sa negosyo karon dinhi sa Cagayan de Oro.
Gani man, daghang mga establisimento ug tindahan sa Cagayan de Oro ang napugos pagsirado human mikaylap ang Covid-19 dinhi sa syudad sugod niadtong bulan sa Marso ning tuig.
Hinoon gipasabot sa opisyal nga ilang paningkamotan ang pag-improbar sa sistema sa pagkolekta og buhis pinaagi sa online tax billing and payment system sa tinguha nga makab-ot ang target collection sa dakbayan sunod tuig.
Gani, giaghat ni Mistula ang mga negosyante sa syudad nga pahimuslan ang online tax billing and payment system ma-access sa online portal nga citytreasurer.cagayandeoro.gov.ph.
Nasayran nga magsugod ang tinuig nga business permit renewal karong Enero 4, 2021.
(City Information Office)
