Usa ka “welcome development” alang sa local medical community ang desisyon ni General Santos City Mayor Ronnel Rivera sa pagpahigayon og Covid summit, taliwala sa padayong pagsaka sa kaso sa virus infections.
Sa pakighinabi sa RPN DXDX GenSan, nagpadayag og kalipay ni Philippine Medical Association-General Santos chapter president, Dr. Fidel Peñamante, sa maong katikaran gikan sa city government.
Una nang nanawagan ang PMA sa maong consultative meeting, aron mahisgutan sa tanang sektor ang angay pang himuon aron matapna ang pagkaylap sa virus, nga miigo na sa 5,513 ka mga residente sa siyudad.
Sa maong ihap, 708 sa mga niini ang nagpabilin pa sa mga balay-tambalanan ug 170 ang nakabsan sa kinabuhi.
“It’s high time. We want everybody to be involved. Kasi from the identification sa problem, the good thing about it, we are all part of the decision-making,” ang tipik sa pamahayag ni Dr. Peñamante.
Sa bahin ni Mayor Rivera, gimanduan na niini ang City-IATF nga magpahigayon na og inisyal nga konsultasyon aron makuha ang pulso, partikular sa business community.
Plano sa city chief executive nga ipahigayon ang dakong panag-pulong sa pipila ka mga umaabot nga inadlaw. (John Rey Somido)