Cebu City – Giaprobahan na sa konseho sa dakbayan sa Lapulapu ang pagdakop sa mga lumulupyo nga di masul-ob og facemask pinaagi sa citizen’s arrest.
Mao kini gipahibawo ni Konsehal Flaviano Hiyas, majority floor leader sa konseho sa maong syudad.
Matod ni Hiyas, naa hinuoy limit sa citizen’s arrest aron di maabusahan sa mga polis o sa mga sibilyan nga modakop sa ilang isigka ingon nga di magtaod og facemask.
Sumala ni Hiyas, ilang gihatagan og 15 minutos ang matag indibiduwal sa pagtangtang sa mask sa mga dapit publiko o gawas sa ilang balay.
Kini tungod kay naa gyoy higayon ang tawo nga mohukas sa mask aron paginhawa og dako, pag-inom og tubig ug pagkaon.
Apan kon molapas na sa 15 minutos, mahimo nang i-apply ang citizen’s arrest.
Gawas niini, gibutyag usab ni Hiyas nga ang usa ka tawo nga hisakpang walay face mask, gihatagan lang og usa ka oras ang concerned citizen pagsikop niini.
Apan kon molapas na sa usa ka oras ug di pa masikop ang tawong wa mag-facemask, dili na kini balido.
I via Jhon Tadlip/ JTY
(Source: Lapu-Lapu City PIO)
