Cebu City – Yano lang nga tulumanon ang giandam sa kagamhanang probinsiyal sa Sugbo alang sa ika-451 ka charter anniversary sa lalawigan karong Huwebes, Agosto 6.
Atol sa press conference sa Barili, si Gob. Gwendolyn Garcia namahayag nga aduna lang silay simple activities sanglit nagpabilin pa man ang restriction sa lugar.
Sumala pa ni Garcia, usa lang kini ka adlaw nga kalihokan sukwahi niadto nga usa ka buwan ang mga programa nga ilang gihan-ay.
Midugang si Garcia nga sukwahi sa milabayng katuigan, wala siyay SOPA o State of the Province Address karon apan naa siyay ipalanog nga mubong mensahe sa maong higayon alang sa mga Sugboanon taliwa sa nasinating pandemic.
Sa pagsaulog sa anibersaryo sa probinsiya karong tuiga, wala nay mga mayor nga dapiton ug limitado na ang mga tawo nga patambongon sa ceremonial flag raising sa buntag.
Matod ni Garcia, iya nang giawhag ang mga mayor nga dili na lang moadto sa Kapitolyo ug magdungan na lang sila pagpahigayon sa pag-isa sa bandera sa flagpole uban sa pag-awit sa nasodnong awit sa maong adlaw. I via Jhon Tadlip/ JTY
(Source: Cebu Provincial Capitol)
