Ya aresta con un persona maga operativa del Criminal Investigation and Detection Group-9 (CIDG-9) na un campanya nombra como el Oplan Pagtugis na provincia del Zamboanga del Norte.
El Oplan Pagtugis, un campanya este del CIDG-9, que ta cuji sila con maga personas quien tiene existente o pendiente orden de aresto
Asegun con Tiniente Coronel Leo Laraga, el hefe del CIDG-Zamboanga del Norte Field Unit, cay con Edna Arnado, sesenta’y ocho años el edad, ya aresta maga alas ocho del Miyerkoles aga na Barangay Dampalan, ciudad de Dapitan na Zamboanga del Norte.
Asegun con Laraga cay si Arnado ta enfrenta el asunto de estafa y tiene le pendiente orden de aresto con el piansa de deci-ocho mil pesos ya dale del Noviembre cuatro, este año, el tribunal del ciudad de Dipolog, Zamboanga del Norte.
Si Laraga ya habla cay ya falya si Arnado paga el arkiler del un edificio que ta arkila ele con su primo que ya resulta na plantada del asunto.
Con Arnado ya lleba na oficina del CIDG na Zamboanga del Norte para el documentacion y propio disposision. (B. Garcia, photo courtesy of CIDG-9)
