Dugang duha ka ospital sa gobyerno sa Central Visayas ang nahunahunaan sa mga scientists sa nasod nga mohimog test sa coronavirus disease kun Covid 19.
Basi sa uwahing monitoring sa COVID-19 Laboratories Capacity sa Department of Health (DOH), ang duha ka tambalanan nahimutang sa Dumaguete ug Tagbilaran City.
Kini mao ang Negros Oriental Provincial Hospital ug Governor Celestino Gallares Memorial Medical Center.
Pagka karon aduna nay pito ka ospital sa nasod nga accredited sa pagpahigayon sa Covid 19 test lakip sa V. Sotto Memorial Medical Center sa Cebu City.
Pero ang accreditation gibahin sa lima ka ang-ang diin ang ikalima ang full-scale implementation sa test.
Ang stage 1 naglambigit sa self-assessment gamit ang mga hiramenta gikan sa Research Institute for Tropical Medicine kun RITM, ang laboratoryo nga nagbasi sa Muntinlupa City nga tig-isyo og certification sa mga laboratories, publiko ug pribado, ug paghimo sa test sa Covid 19.
Ang pipila ka factor nga pahimug-atan sa stage 1 naglakip sa access to the laboratory, design of the laboratory, use of laboratory safety equipment, administrative control and management, records and documentation, ug personnel practices and training.
Samtang sa stage 2 adunay on-site visits sa mga eksperto gikan sa DOH, RITM, ug World Health Organization (WHO) diin ilang i-validate ang self-assessment sa unang bahin ug sa stage 3 ang tulo ka adlaw nga bansay-bansay sa mga personnel nga mopadagan sa laboratoryo.
Apr. 3/Local