Giandam sa Kapitolyo ang ₱650 milyones nga budget alang sa pagpaayo sa mga pasilidad ug imprastruktura sa mga district ug provincial hospitals sa 2026. Kini nagpakita nga seryoso si Gobernor Pamela Baricuatro sa iyang saad nga lig-onon ang health system sa probinsya nga iyang gilitok sa State of the Province Address.
Sumala ni Capitol Piso Health Consultant Dr. Nikki Catalan, ang maong pondo gamiton sa pag-upgrade sa mga infirmary ngadto sa Level 1 hospitals, ug gikan sa Level 1 ngadto sa Level 2 facilities. Sa pagkakaron, 16 ka ospital ang gidumala sa Kapitolyo: 10 niini infirmary, 4 ka Level 1, ug 2 ka Level 2 hospitals.
Matod ni Dr. Catalan, dako pa og hagit ang pag-atubang sa daghang problema sa healthcare system, apan hinay-hinay nga naglihok ang Kapitolyo aron makahatag og mas paspas, mas duol, ug mas mahigugmaong serbisyo alang sa tanang Sugboanon.
Lakip sa gihimo karon mao ang pagdungag og mga doktor, espesyalista, ug nurses; pagsiguro nga makahatag dayon og budget para sa tambal ug gasolina sa ambulansya; ug pagpalit sa kinahanglanon nga medical supplies.
Dugang pa, nagpadayon usab ang probinsya sa medical ug surgical missions nga libre alang sa mga pasyente. Ang ika-upat nga edisyon niini gipahigayon niadtong Sabado ug Domingo sa Carcar City.
Giingon ni Dr. Catalan nga kini usa lamang ka temporaryo nga paagi samtang giandam pa nga mahatag kini nga serbisyo diretso sa mga ospital sa Kapitolyo.
Source: Cebu Province PIO
I via Renante Socia Lada