Napalgang wala nay kinabuhi ang usa ka 58-anyos nga lady guard nga si Chona Gonzaga sulod mismo sa iyang panimalay sa nakalabay na adlaw, sa ilang balay sa Barangay Punta Engaño, siyudad sa Lapu-Lapu.
Si Gonzaga, nga nagtrabaho isip security guard sa usa ka mall, nakit-an nga naligo sa kaugalingong dugo. Sumala sa kapulisan, ang bag-ong kapuyo sa biktima nga 25 anyos ug usa ka utility worker ang giilang posibleng responsable sa krimen. Giingon nga kuyog pa sa biktima nga nanglaba pagkahapon apan kalit na lang kining nawala pagkahuman sa insidente.
Sa crime scene, nakuha ang pipila ka mga gamit nga giingong gigamit sa pagpamatay lakip na ang atsa, martilyo, glass cutter, pala, ug flower base.
Ang mga anak sa biktima wala makadungog og samok o lalis tungod sa kusog nga ulan, ug nasayod na lang sa panghitabo gikan sa mga silingan.
Padayon karon ang manhunt operation sa kapulisan aron madakpan ang suspetsado ug mapanubag sa hukmanan sa sala nga iyang nabuhat.
I via Renante Socia Lada