Nasakmit sa mga otoridad ang gibana-banang 20,000 ka sako sa bugas humay nga giingong smuggled gikan sa Pakistan ug Vietnam, sa usa ka bodega sa Barangay San Roque, Talisay City. Ang operasyon gihimo alas 11:30 sa buntag niadtong Miyerkules, mokantidad kini og ₱38 milyon.
Ang maong operasyon gipangulohan sa Agriculture Economic Sabotage Council (AAES) uban sa suporta sa Special Assistant to the President for Investment and Economic Affairs Secretary Frederick Go, kauban ang mga sakop sa Regional Maritime Unit 7 ug CIDG-Regional Field Unit 7. Kini ang unang higayon nga gironda ang usa ka bodega sa Central Visayas human nga napirmahan ang Republic Act 12022 o Anti-Agricultural Economic Sabotage Law.
Matud ni Secretary Frederick Go, giinspeksyon ug giimbestigahan ang mga goods ug napamatud-ang iligal kini. Gipasabot niya nga kini nga aksyon nagpadala og klaro ug lig-on nga mensahe sa mga saboteur sa agrikultura ug ekonomiya nga andam ang gobyerno nga molihok batok sa mga iligal nga kalihokan.
Ang Department of Justice (DOJ) gitakdang mopasaka og kasong economic sabotage batok sa tag-iya sa maong mga bugas. Ang maong kaso walay pyansa ilawom sa bag-ong balaod nga gisumpo sa pagpang-smuggle sa mga produktong agrikultural.
Nagpabilin ang gobyerno nga determinado sa pagpugong sa pagpang-smuggle ug pagpanalipod sa lokal nga mga mag-uuma. Ang mga awtoridad nagpasalig nga padayon ang ilang kampanya batok sa mga grupo nga nanikas ug nakadaot sa ekonomiya sa nasud.
I via Renante Socia Lada