Usa ka dako ug delikadong vintage bomb ang nakawot sulod sa compound sa Commission on Audit (COA) Regional Office VII nga nahimutang sa MJ Cuenco Avenue, kanto sa V. Sotto Street, Barangay Tinago, niadtong buntag sa Hulyo 8, 2025.
Ang maong bomba nakit-an atol sa pagtrabaho sa konstruksyon site sa compound. Nangayo dayon og tabang ang mga personnel sa COA sa duha ka police officers nga nagpatrolya sa lugar, silang Patrolman Joseph Canarejo ug Patrolman Mark Jason Delima, human masayran nga usa ka backhoe ang nakakawkaw sa maong eksplosibo.
Ang backhoe operator nga si Eric Bacus, 46 anyos, nga empleyado sa 3R Construction, miingon nga pasado alas 9 sa buntag iyang natumbok ang maong bomba samtang nag-ukay sa yuta. Sa iyang pagkahadlok nga mobuto kini, iyang giluwatan ang impormasyon ngadto sa iyang mga kauban ug dayong gipaabot sa kapulisan.
Dayon nga mitubag ang mga otoridad gikan sa Regional Explosive and Canine Unit (RECU) 7 nga gipangulohan ni Police Lieutenant Joel Taboada. Malampuson nilang nakuha ug naproseso ang bomba, nga gibana-banang adunay gibug-aton nga 1,000 ka libras ug giila nga usa ka ‘General Purpose’ bomb, nga kasagarang gigamit sa panahon sa gubat.
Nagpabilin ang kapulisan nga alerto ug nagpahimangno sa publiko nga magmatngon ug mosumbong dayon sa otoridad kung adunay makit-an nga mga kadudahang butang, ilabi na kung kini posibling delikado sa kinabuhi ug kahimtang sa komunidad.
I via Renante Socia Lada