Malampuson nga nasakmit sa kapulisan ang gibanabana’ng ₱3.5 milyones nga kantidad sa gituohang shabu atol sa usa ka buy-bust operation nga gipahigayon sa Barangay Cabulihan, Tubigon, Bohol, niadtong Hulyo 20, 2025. Ang maong operasyon gipasiugdahan sa Philippine National Police – Drug Enforcement Group (PNP-DEG) Special Operations Unit 7 pinangulohan ni PCPT Jose Rodel A. Villaruel, ubos sa direktang superbisyon ni PLTCOL Eduardo S. Guevara Jr., OIC sa SOU7.
Nasikop sa operasyon ang duha ka suspek, usa ka 51-anyos nga residente sa Brgy. Cabulihan ug usa ka 25-anyos nga taga Purok 5, Brgy. Centro, Tubigon. Nakuha gikan kanila ang usa ka heat-sealed nga transparent plastic pack nga ilang gibaligya ug lima ka knot-tied nga plastic packs nga gituohang shabu nga ilang gitago alang sa posisyon.
Kini nga kalampusan usa ka mahinungdanong lakang sa padayon nga kampanya sa kapulisan batok sa iligal nga drogas sa lalawigan. Nagpakita kini sa lig-on nga koordinasyon tali sa mga yunit sa PNP ug sa suporta sa lokal nga panggamhanan ilabina kang Governor Erico Aristotle Aumentado, nga aktibong nagtutok sa pagpahawa sa droga sa Bohol.
Gipasabot ni PCOL Arnel Banzon, Provincial Director sa Bohol PPO, nga ang maong pagkadakop usa ka klaro nga ebidensya sa ilang walay hunong nga paningkamot sa pagpangdakop sa mga drug personalities. Gibalik usab ni PLTCOL Norman Nuez, tigpamaba sa Bohol PPO, nga ang kalampusan sa operasyon resulta sa lig-on nga koordinasyon ug suporta gikan sa komunidad.
Padayon nga nag-awhag ang kapulisan sa publiko nga magpabiling mabinantayon ug ipadayon ang pakig-alayon pinaagi sa pagreport sa mga kalihukan nga may kalabutan sa drogas aron masiguro ang kahapsay ug kaluwasan sa komunidad ug sa umaabot nga henerasyon.
Source: Bohol PNP
I via Renante Socia Lada
#rpndykccebu