Nakolekta ang ₱2.9 milyon atol sa unang Governor’s Zero Hunger Run nga gipasiugdahan sa Gobyerno sa Lalawigan sa Sugbo. Mokabat sa 3,500 ka mga runners ang miapil sa maong kalihokan nga nagtumong sa pagtabang sa mga programa batok sa kagutom ug kakulang sa hustong nutrisyon.
Sumala ni Gobernadora Pamela Baricuatro, ang kalampusan sa maong dagan tungod sa panaghiusa sa mga Sugbuanon. Matud niya, dili mapapas ang kagutom kung dili magtinabangay ang gobyerno, pribadong sektor ug komunidad.
Kabahin ang maong fundraising run sa pagsaulog sa 457th Founding Anniversary sa Lalawigan sa Sugbo ug gipasiugdahan sa Cebu Provincial Sports Commission. Ang gobernador mismo miapil sa 1K fun run uban sa mga opisyal, empleyado sa Kapitolyo ug uban pang mga bisita.
Ang salapi nga nakolekta gamiton sa mga programa sa lalawigan aron mapalig-on ang food security ug mapauswag ang nutrisyon sa mga Sugbuanon. Nagpasalamat usab si Gov. Baricuatro sa tanang runners, volunteers, sponsors, ug mga ahensya nga mitabang aron mahimong malampuson ang maong kalihokan.
I via Renante Socia Lada