Nasakmit sa usa ka dakong joint anti-illegal drug operation ang kapin ₱136 milyon kantidad sa gidudahang shabu ug nadakpan ang duha ka High-Value Target (HVT) sa dakbayan sa Naga, Sugbo.
Ang operasyon gihimo pasado alas 4:50 sa hapon kagahapon Mayo 23, 2026 sa Purok Gaway-Gaway, Barangay Uling, Naga City, Cebu. Gipangulohan kini sa Philippine Drug Enforcement Agency (PDEA) Cebu Provincial Office uban sa nagkadaiyang law enforcement units.
Lakip sa miapil sa operasyon ang PDEA IIS-IOU, Provincial Drug Enforcement Unit (PDEU), City of Naga Police Station, Provincial Intelligence Unit, PNP Drug Enforcement Group (PNPDEG), ug Philippine Coast Guard Intelligence Unit-Central Visayas.
Nasakmit sa mga otoridad ang gibana-banang 20 ka kilo sa gidudahang shabu nga gisulod sa daghang vacuum-sealed plastic packs ug gitago sulod sa Chinese tea bags. Sumala sa kapulisan, aduna kining standard drug value nga mokabat sa ₱136 milyon.
Narekober usab sa operasyon ang buy-bust money nga adunay usa ka tinuod nga ₱1,000 bill nga gibutang ibabaw sa boodle money, tulo ka cellphone, usa ka ID card, itom nga pouch, ug usa ka itom nga Chevrolet Venture nga giingong gigamit sa drug transaction.
Ang duha ka nadakpan karon nag-atubang og kaso sa paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Gidayeg ni Cebu Police Provincial Office Director PCOL Abubakar Udanf Mangelen Jr. ang mga operatiba tungod sa malampusong operasyon.
Matud pa niya, dakong tabang kini aron mapugngan ang pagsulod sa illegal nga drogas sa mga komunidad sa Sugbo.
Gipasalamatan usab ni PRO-7 Regional Director PBGEN Arnold Evangelista Abad ang tanang ahensya nga miapil sa operasyon ug giingong importante ang lig-on nga panagtinabangay aron mabungkag ang mga sindikato sa drogas sa Central Visayas.
Mipadayag usab og suporta si Cebu Governor Pamela Baricuatro sa kampanya batok sa illegal nga drogas ug giingong padayon nga kinahanglanon ang kooperasyon sa gobyerno ug komunidad aron mapadayon ang kalinaw ug kaluwasan sa Sugbo.
Padayon pa karon ang imbestigasyon ug follow-up operations aron mailhan ang uban pang posibleng konektado sa illegal drug network.
I via Renante Socia Lada