Nagpagawas og Yellow Alert ang National Grid Corporation of the Philippines (NGCP) sa Visayas Grid karong Agosto 5, 2026, nga ipatuman gikan sa alas-3 sa hapon hangtod alas-9 sa gabii.
Base sa advisory, ang available capacity sa kuryente anaa lang sa 2,431 megawatts (MW) samtang ang gilauman nga peak demand moabot sa 2,373MW. Nagpasabot kini nga gamay na lang ang reserbang suplay sa kuryente kung adunay kalit nga problema sa grid.
Sumala sa NGCP, usa sa mga hinungdan sa Yellow Alert mao ang pagka-undang sa operasyon sa lima ka dagkong coal power plants sa Visayas. Dugang pa, adunay 13 ka power plants nga dili makapadagan sa ilang tibuok kapasidad, hinungdan nga kapin 1,081.5MW ang wala magamit sa grid.
Gipasabot sa NGCP nga ang Yellow Alert wala pa nagpasabot og brownout, apan nagtimaan kini nga nipis na ang reserbang suplay sa kuryente ug kinahanglan nga bantayan ang kahimtang sa Visayas Grid.
I via Renante Socia Lada