Ang Cebu Police Provincial Office (CPPO) mipagawas og taho nga walay natalang bisan unsang insidente sa krimen sa tibuok Cebu Province sa pag abli sa klase alang sa School Year 2026-2027. Sumala sa kapulisan, resulta kini sa hugot nga seguridad ug maayong koordinasyon tali sa kapulisan, lokal nga panggamhanan, mga eskwelahan, ug komunidad ubos sa programa nga Balik Eskwela 2026.
Aron masiguro ang kaluwasan sa mga estudyante, magtutudlo, ginikanan ug kawani sa eskwelahan, gipakatap sa kapulisan ang mga pulis sa mga pampubliko ug pribadong eskwelahan, mga dagkong karsada, terminal ug uban pang lugar nga daghang tawo sa tibuok probinsya.
Sayo pa sa buntag, aktibong mitabang ang mga pulis sa pagdumala sa trapiko, pagtabok sa mga estudyante ug ginikanan sa dalan, ug pagkoordinar sa mga opisyal sa eskwelahan aron masiguro ang hapsay ug malinawon nga pagsugod sa klase.
Gipadayag ni CPPO Provincial Director PCOL Abubakar Udang Mangelen Jr. nga ang malinawon nga pagbukas sa klase bunga sa maampingong pagpangandam sa kapulisan ug sa suporta sa mga partner nga ahensya ug komunidad. Matud niya, ang zero crime incidents nagpakita sa pagkaepektibo sa ilang mga lakang sa seguridad ug sa pagbantay sa mga pulis sa matag lugar.
Samtang, gidayeg ni PRO-7 Regional Director PBGEN Arnold Evangelista Abad ug Cebu Governor Pamela Baricuatro ang paningkamot sa tanang sektor nga mitabang aron magpabiling luwas ug malinawon ang unang adlaw sa klase. Padayon usab ang mga operasyon sa Balik Eskwela sa tibuok tuig pinaagi sa regular nga patrolya, pagdumala sa trapiko ug suod nga koordinasyon sa mga eskwelahan ug lokal nga panggamhanan.
I via Renante Socia Lada