Sa sunod-sunod nga manhunt operations nga gipahigayon sa nagkalain-laing parte sa lalawigan, nadakpan sa Cebu Police Provincial Office (CPPO) ang pipila sa mga most-wanted nga kriminal nga dugay nang nagtago.
Sa lungsod sa Catmon, nadakpan ang suspetsadong gitawag og “Luna”, residente sa Sitio Sto. Niño, Barangay Flores. Sa Tuburan, nasikop usab ang usa ka lalaki nga nailhan nga “Marvin” sa Purok Talisay, Barangay Kalangahan. Samtang sa Toledo City, nadakpan ang “Tata”, usa ka reflexologist nga nagpuyo sa Sitio Mahayahay, Barangay Daanlungsod.
Ang tanang pagdakop gihimo ubos sa warrant of arrest nga gi-issue sa korte ug gisunod sa hustong police procedure ug pagrespeto sa katungod sa tawo. Matod ni PCOL Abubakar Udang Mangelen Jr., Provincial Director sa CPPO, kini nga operasyon nagpakita sa tinud-anay nga paningkamot sa kapulisan aron maprotektahan ang katawhan ug mapatuman ang disiplina sulod sa organisasyon.
Gipasabot usab ni Mangelen nga kini nga mga pagdakop kabahin sa intelligence-driven campaign aron tangtangon ang mga kriminal nga nagpahimulos sa mga kabus ug mas vulnerable nga sektor sa katilingban.
Gisubli usab niya ang mensahe ni PBGEN Redrico A. Maranan nga ang tinuod nga “Makabagong Pulis sa Makabagong Panahon” mao ang respetado nga katawhan ug disiplinado nga kapulisan.
Giawhag sa CPPO ang publiko nga magpabilin nga mabinantayon ug motabang pinaagi sa pagreport sa mga kriminal nga ilang mahibal-an sa pinakaduol nga estasyon sa kapulisan o sa opisyal nga hotline sa Cebu Police Provincial Office. Pinaagi sa panaghiusa sa kapulisan ug komunidad, gilauman nga magpabilin ang Cebu Province nga malinawon ug luwas nga lugar alang sa tanan.
Source: CPPO
I via Renante Socia Lada