Trahedya ang nahitabo sa usa ka 13 anyos nga estudyante human kini nalumos sa dagat sa Barangay Ermita, Cebu City niadtong Marso 3, 2026.
Ang biktima giila nga si Xian, Grade 8 student sa Mabolo National High School. Sumala sa report, ni-cutting sa klase ang biktima uban sa iyang kauban pasado alas 12 sa udto ug nangadto sa dagat aron maligo.
Pag-abot sa alas 3 sa hapon, samtang nangaligo, kalit lang nalumos ang biktima. Matud pa sa iyang kauban nga si Alyas Mark, nakita na lang niya si Xian nga nagkapa-kapa sa tubig.
Gisuwayan niya kini og luwas apan gikuptan siya sa biktima, hinungdan nga napugos siya sa pagwakli aron dili usab siya malumos.
Nangayo siyag tabang sa usa ka lalaki nga naa sa daplin, apan wala usab kini makatabang. Dili diay kahibalo molangoy ang biktima, maong dali kini nalumos.
Miresponde ang mga sakop sa Cebu City Disaster Risk Reduction and Management Office ug gidala ang biktima sa Cebu City Medical Center, apan gideklarar nga wala na kini kinabuhi pag-abot sa ospital.
Ang insidente usa ka pahimangno sa mga ginikanan ug estudyante nga likayan ang pag-cutting sa klase ug magbantay kanunay ilabi na kung mangadto sa dagat nga dili kahibalo molangoy.
Source: CCPO
I via Renante Socia Lada