Usa ka batan-ong drayber sa motorsiklo ang namatay diha-diha dayon samtang ang iyang kapuyo naangol sa usa ka trahedya nga aksidente sa Provincial Road sa Barangay Bolocboloc sa maong lungsod, sa alas 2:50 sa hapon Domingo, Hunyo 15, 2025.
Ang biktima nga si Alfred Ricaplaza Undang, 27 anyos ug molupyo sa Barangay Japitan, Barili, nalagpot gikan sa motorsiklo ug mitugpa sa naka-parking nga tricycle, hinungdan sa iyang kamatayon.
Ang iyang kapuyo nga si Olivia Apostol Wolfe, 22 anyos, nasamdan ug gidali sa tambalanan sa Sugbo. Matod sa imbestigasyon sa Barili Police Station, gikan pa sa Barangay Mantayupan ang duha ug pauli na unta sa ilang pinuy-anan. Sa likoon nga bahin sa dalan, giingong nawad-an og kontrol si Undang sa pagmaneho, hinungdan nga nabali ang ilang motor ug napalayo sila sa karsada.
Maswerte nga walay sakay ang chariot o tricycle nga ilang natugpaan, nga gipanag-iya ni Edgie Jurado Garcia, nga lumulupyo usab sa lugar. Sa panag-istorya sa kapamilya sa biktima ug sa tag-iya sa tricycle, nagkasabot sila nga moabag kini sa gastusan sa lubong sa namatay, isip simbako ug tabang sa pamilya.
I via Renante Socia Lada